693 Бардыгы /

ДУБАЙ. Араб Эмиратынын колдоосу аркасында Кыргыз Республикасынын Дубай шаарындагы Башкы консулдугу тарабынан уюштурулган  Бишкек шаарынын Ички иштер башкы башкармалыгынын начальниги К. Жумагазиев, Кыргыз Республикасынын Ички иштер министрлигинин Академиясынын начальниги А.Бийбосунов курамындагы  Кыргызстандын Ички иштер министрлигинин атайын делегациясы Дубай эмиратынын (БАЭ) полициясынын Штаб-квартирасында болушту.

 Иш-сапардын алкагында Дубайдын полиция башчысы, генерал-майор Абдулла Халифа Аль-Марри, полиция бөлүмдөрүнүн жетекчилери, мунун ичинде Дубайдын Полиция Академиясынын жетекчиси менен жолугушуулар жүрдү. Анын учурунда санариптик технологиялар, түз байланыштарды орнотуу жана ыкчам маалымат менен алмашуу, ошондой эле кылмыштуулукка каршы күрөшүүдө өз ара аракеттенүү боюнча жааттарда кызматташуу чөйрөлөрүн козгогон маселелердин кеңири спектри талкууланды. 

Бул сапардын жүрүшүндө жетишилген негизги макулдашуулардын бири өлкөнү санариптештирүү жылында жарыяланган, жүргүзүлүп жаткан реформаларды колдоо максатында техникалык жардам  жана программалык камсыздоо берүү менен   Бишкек шаарында акылдуу полиция участогун (Smart Police Station долбоору) түзүүгө Дубайдын полициясынын колдоосу жана макулдугу болду. «Акылдуу полиция участогу» долбоору биринчи жолу 2017-жылы Дубайда иштелип чыккан жана ишке киргизилген, ошондой эле заманбап IT технологиялардын жана программалык камсыздоонун жардамы аркасында калкты  тейлөө жана кызмат көрсөтүнү жогорулатууга жана көзөмөлдөөгө багытталган санариптик кызмат көрсөтүүлөрдүн кеңири комплекси болуп саналат. 

Жетишилген макулдашууларды ишке ашыруу үчүн Дубайдын полициясынын Штаб-квартирасынын жетекчилиги биргелешкен жумушчу тобун түзүүгө, мунун ичинде криминология, жол коопсуздугу жаатында жана IT чөйрөсүндө квалификацияны жогорулатуу курсун өтүү үчүн Кыргыз  Ички иштер министрлигинин кызматкерлерин жана адистерин чакыруу менен түүзүүгө даярдыгын билдирди.         Ошондой эле Кыргыз  Ички иштер министрлигинин курсанттары үчүн Дубайдын Полиция Академиясында акысыз окуу укугу менен атайын квота берүү жөнүндө маселенин Дубайдын полициясынын жетекчилиги тарабынан оң жагынан каралгандыгын белгилеп кетүү дагы маанилүү.   

Ошентип, жетишилген макулдашууларды бекитүү жана эки тараптуу кызматташуунун дараметин өстүрүү максатында Кыргыз  Ички иштер министрлиги менен Дубайдын Полициясынын ортосундагы кызматташуу жана коопсуздук жөнүндө атайын Меморандумга кол коюлду.

Алишер ТОКСОНБАЕВ, өз кабарчы