1,045 Бардыгы /

Сурхандарыя облусундагы «Шаргунькумир» көмүр ишканасынын 200дөй шахтачысы иш таштап, каршылык акциясына чыкты.

Нааразылык акциясынын катышуучуларынын биринин айтымында, эмгек шартынын оордугу аларды бул кадамга түрткөн:

– 14-августта биз ишке келип, кийинип, бирок иштеген жокпуз. Жумушчулардын баары жетекчилик менен жолугушууну талап кылышты. Директор Анвар Очилдиев келди. Шахтачылар менен директордун ортосунда жаңжал чыгып, биз бир пикирге келе алган жокпуз. Андан соң ички иштер органдарынын ондой кызматкери менен аким келди. Алар кечинде жетекчиликти иштен алып, биздин маселени чечүүгө убада беришти. Түштө жумушчулар үйүнө кетишти, ал күнү иштеген жокпуз.

Маалыматтарга караганда, район жетекчилиги кесиптик кошуун жетекчисин гана иштен алган. Нааразы болгон жумушчулар аймакта иш сапар менен жүргөн президенттин кеңешчиси Алишер Усманов менен жолугушкан. Бирок жетекчиликти кызматтан алуу талабы орундатылган эмес.

Айлык акынын аздыгына да нааразы болгон шахтачылар 15-августта да иш ташташкан.

– Биз жерден миң метр ылдый түшүп көмүр казабыз. Шахтага түшкөн сайын өлүп калышыбыз мүмкүн экенин сезип турабыз. Мындай оор жумуш үчүн бизге болгону 1 миллион сум (100 доллардан бираз көп) төлөшөт. Мындай маянага кантип жашоого болот? Шахтачыларды азыр баалашпайт.

«Шаргунькумир» акционердик коомунун директору Анвар Очилдиев шахтачылардын иш таштаганын тастыктады. Ал айлык акы Эмгек министрлиги бекиткен тарифтик көрсөткүчтүн негизинде төлөнүп жатканын, атайын комиссия маселени иликтеп, эч кандай кемчилик таппаганын айтты.

2018-жылы 8-ноябрда президент Шавкат Мирзиёевдин буйругунун негизинде «Узбеккумир» жана «Шаргунькумир» ишканалары «Узбекистон темир йуллари» акционердик коомуна кошулган.

www.