697 Бардыгы /

ЫСЫК-КӨЛ. «Жер-жерлерде ишкерлерди колдоо өлкөбүздүн экспорттук дараметин кеңейтүүгө гана багытталган», — деп баса белгиледи Президент Сооронбай Жээнбеков Чүй облусунун Ысык-Ата районунун кайра иштетүүчү жана айыл чарба ишканаларынын ишмердиги менен таанышуу маалында.

«Кант-Сүт» ЖЧКсы сүт иштетүүчү ишканасына баш баккан мамлекет башчысына ишкананын өндүрүштүк кубаттуулугу суткасына 140 тоннаны түзөрүн маалымдашты. Бул ишкана өлкөбүздөгү сүт өндүрүшүнүн эң алдыңкы сабында турат. Анын өндүргөн продукциясы Казакстан, Өзбекстан, Тажикстандын, ошондой эле ЕАЭБ өлкөлөрүнүн рынокторуна дагы үзүлтүксүз экспорттолот. «Кант-Сүт» ЖЧКсы 302 адамды жумушчу орду менен камсыздады. Өткөн жылдын жыйынтыгына караганда, ишканада сатуунун көлөмү 644 миллион сомдон ашып, бул көлөмдөн 148 миллион сомдон ашык каражатка продукция экспорттолгон.

Президент Сооронбай Жээнбеков ошондой эле инкубациялык жана тамак-аш жумурткаларын, суткалык жөжөлөрдү өндүрүү менен алектенген «Три Т» ЖЧКсы асыл тукум канаттуулар заводунун ишмердиги менен дагы жеринде таанышты. Бул ишкананын өндүрүш ишмердигинде заманбап немис жабдыктары колдонулуп, таза, сапаттуу продукция алынаары өзгөчө белгиленди. Аталган ишканада 95 киши эмгектенет. 2019-жылы ишкана тарабынан өндүрүмдүн көлөмү 250 миллион сомду чапчыды. Ошондой эле «Три Т» ЖЧКсы ЕАЭБге мүчө мамлекеттерге продукциясын экспорттой алган уюмдардын реестрине дагы киргизилген. Мамлекет башчысы ушундай ишкерлердин аракеттери менен аймактардын социалдык-экономикалык өнүгүүсү толук кандуу камсыздалып, жаңы жумушчу орундары түзүлүп, бул аркылуу ички миграция кыскарып жаткандыгын зор канааттануу менен белгиледи.

Президент Сооронбай Жээнбеков жергиликтүү өзүн-өзү башкаруу органдары тарабынан ишкерликке ар тараптуу жардам көрсөтүү, берилип жаткан жеңилдетилген насыялардын көлөмүн дагы жогорулатуу, бизнести жер-жерлерде жүргүзүү үчүн административдик тоскоолдуктарды азайтуу зарылдыгын дагы бир жолу баса белгиледи.

Алишер ТОКСОНБАЕВ, өз кабарчы