658 Бардыгы /

БРЮССЕЛЬ.  Европа Биримдигинин институттарына жумушчу сапарынын алкагында Брюссель шаарында Кыргызстандын Тышкы иштер министри Чыңгыз Айдарбеков Европа тараптын чакыруусуна ылайык курчап турган чөйрө жана климаттын кескин түрдө өзгөрүшү боюнча  Европа Биримдиги– Борбор Азия Жумушчу тобунун 9-отурумунун ачылышында ардактуу конок катары сөз сүйлөдү.

Өз сөзүндө Кыргыз министри Чыңгыз Айдарбеков жалпысынан Кыргызстанда жана Борбор Азияда соңку жылдарда климаттын кескин түрдө өзгөрүшүнүн байкалып жаткан терс кесепеттери, ошондой эле климаттын өзгөрүшүнө ыңгайлашуу боюнча өлкө көрүп жаткан чаралар, мунун ичинде, өзгөчө орунду ээлегенКыргыз Республикасында «Жашыл экономиканы» өнүктүрүү тууралуу отурумдун катышуучуларына кең-кесири маалымдады. Климат жана экология тармагындагы кызматташтык Кыргызстандын тышкы саясатынын артыкчылыктуу багыттарынын бири экендигин министр жашырган жок. Ошондой эле климаттын ыкчам өзгөрүшүнө жана ага таасир этүүгө, атап айтканда, мөңгүлөрдүн эришине, уран калдык сактагычтарын реабилитациялоого байланышкан көйгөйлөрдү практикалык жактан чечүү үчүн өлкөдө экологиялык дипломатия боюнча күч аракеттердин улам күчтөндүрүлүп жаткандыгын белгиледи. Кыргызстандын БУУнун Туруктуу Өнүгүү Максаттарын жана Париж келишимин жактай тургандыгын тастыктады жана аларды ишке ашырууга бардык өлкөлөрдү активдүү аралашууга үндөдү.

Баса, климаттын өзгөрүшүнө каршы туруктуу күрөшүүдө жана анын кесепеттерине ыңгайлашууда өз ара аракеттенүүнүн бардык деңгээлдеринде мамлекеттердин, Эл аралык жана бейөкмөт уюмдардын, жарандык сектордун, бизнес-коомчулуктун күч аракеттерин үзгүлтүксүз консолидациялоонун маанилүүлүгүн дагы баса белгиледи.

Европа Биримдиги менен Борбор Азиянын кызматташтык Концепциясын жүзөгө ырааттуу ашыруунун алкагында 2020-жылы жайында Бишкекте «Борбор Азия – Европа Биримдиги: жашыл экономика чөйрөсүндөгү өнөктөштүк аракетте» аталышында Биринчи экономикалык Форум болорун министр кабарлады. Анан бардык кызыкдар тараптарды Форумга батыл катышуугачакырды.

Алишер ТОКСОНБАЕВ, өз кабарчы