903 Бардыгы /

Акыркы жумада АКШ Конгрессинин медициналык борборунда тесттен өткөн кызматкерлердин 13 пайызынан COVID-19 вирусу аныкталган.

Бир апта мурун инфекция жуктуруунун орточо деңгээли бир пайызды түзгөн. Бул тууралуу Конгресс дарыгеринин мыйзам чыгаруучуларга жөнөткөн катында айтылат.

Дарыгер Брайан Мойнихендин эсебинде Конгресстин жүздөгөн кызматкери вирус жуктуруп алган. Ал АКШ парламентинин жетекчилигин мүмкүнчүлүккө жараша виртуалдык форматта иштөөнү уюштурууга чакырды. Дарыгердин тизмесиндеги кызматкерлердин үчтөн экисине “омикрон” штаммы жуккан. Конгресстин медициналык борборунда мыйзам чыгаруучулар, алардын аппаратынын кызматкерлери жана Капитолийге катталган журналисттер тесттен өтүп турат.

Акыркы күндөрү бир нече белгилүү мыйзам чыгаруучу, анын ичинде сенатор-демократ Элизабет Уоррен COVID-19 вирусу аныкталганын билдирген. Дарыгер Мойнихендин катында эмделип, бирок вирус жуктуруп алгандар үчүн оору жеңил формада өтүп жатканын айтты. Ооруканага жаткандар жана өлгөндөр жок.

Конгресстин ичинде беткап тагынуу боюнча бирдиктүү эреже жок. Өкүлдөр палатасында милдеттүү түрдө беткап тагынуу керек. Беткапсыз жыйындар залына кирген мыйзам чыгаруучуларга 2500 доллар айып пул салынышы мүмкүн. Сенатта болсо беткап милдеттүү эмес. Беткап тагынуудан баш тартканы үчүн айып пулга жыгылгандар азырынча – мыйзам чыгаруучу республикачылар.

WWW.