906 Бардыгы /

Казакстанда премьер-министрдин мурдагы биринчи орун басары Алихан Смаилов башында турган өкмөттүн жаңы курамы бекитилди. Министрлер кабинетинин көпчүлүк мүчөлөрү өз орундарын сактап калышты же кызматтык тепкичтен көтөрүлүштү.

Казакстан президенти Касым-Жомарта Токаев жарлыкка 11-январь күнү кечке маал кол койду.

Премьер-министрдин мурдагы орун басары Роман Скляр өкмөт башчынын биринчи орун басары болду. Вице-премьер Ералы Тугжанов мурдагы кызматында калды. Соода жана интеграция министри Бахыт Султанов портфелин сактап калды жана премьер-министрдин орун басары кызматына дайындалды.

«Самрук-Казына» фондунун активдерин башкаруу башкармалыгынын мурдагы директору Болат Акчулаков энергетика министри болду.

Президенттин администрациясынын мурдагы биринчи орун басары Даурен Абаевге маданият жана спорт министри кызматы тийди. Маалымат жана коомдук өнүгүү министрлигин министрдин мурдагы орун басары Аскар Умаров жетектемей болду. Жогорку соттун административдик иштер боюнча соттук коллегиясынын мурдагы төрагасы Канат Мусинге юстиция министрлиги тийди. Саламаттык сактоо министрлигине министрдин мурдагы орун басары Ажар Гиният келди. Экономика министри болуп Алибек Куантыров дайындалды, ал мурун министрдин орун басары болгон. Индустрия жана инфраструктуралык өнүгүү министри кызматы Каирбек Ускенбаевге тийди. Ал дагы буга чейин аталган министрликтин башчысынын орун басар болгон.

Өкмөттүн жаңы курамында өз креслолорун премьер-министрдин орун басары – тышкы иштер министри Мухтар Тлеуберди, каржы министри Ерулан Жамаубаев, санариптик өнүгүү , инновациялык жана аэрокосмостук өнөр жай министри Багдат Мусин, экология, геология жана жаратылыш ресурстары министри Сериккали Брекешев, билим берүү жана илим министри Асхат Аймагамбетов, эмгек жана калкты социалдык жактан коргоо министри Серик Шапкенов, айыл чарба министри Ербол Карашукеев сактап калды. Коргоо министри Мурат Бектанов, ички иштер министри Ерлан Тургумбаев жана өзгөчө кырдаалдар министри Юрий Ильин да мурдагы кызматында калды.

5-январда мурдагы өкмөт башчы Аскар Мамин Казакстандагы соңку тополоңдорго байланыштуу кызматтан алынган.

WWW.