966 Бардыгы /

Түштүк Кореянын борбору Сеул шаарындагы Суңшил университетинен 25 адамдан куралган делегация Ош технологиялык университетине жайкы лагерге келишти. ОшТУнун ректору, профессор Жанболот Турсунбаев чет өлкөлүк делегацияны өзү тосуп алып, аларга Ош технологиялык университети туурасында кең-кесири  маалымат берүү менен бирге терең ыраазычылыгын дагы билдирди.

        – ОшТУнун Сежоң Хагдан Корей тили борборунун уюштуруусу менен жыл сайын салтка айланган иш-чара быйыл дагы өткөрүлүп, келген делегация ушул жылдын 28-июлуна дейре биздин окуу жайда болушмакчы. Мында, биринчиден, корей борборунан тил үйрөнүп жатышкан студенттерге жана окуучуларга корей тилинде сабак өтүшөт. Экинчиден, эки элдин маданиятын даңазалоо жана эки мамлекеттин ортосундагы байланышты ого бетер чыңдоо максатында ар кандай оюн-зоок программалары дагы уюштурулмакчы, – деди ОшТУнун ректору Жанболот Турсунбаев.

        Ош технологиялык университети бир нече жылдан бери Түштүк Корея мамлекети менен тыгыз байланышта иш алып баратат. Эки тараптуу түзүлгөн келишимдерге ылайык Академиялык Мобилдүүлүк программасы боюнча  ОшТУнун бир нече студенттери Түштүк Кореянын жогорку окуу жайларында  билим алып келишти. Ошондой эле ушул тапта ОшТУнун дагы бир топ улан-кыздары Түштүк Кореяда билимдерин ырааттуу улантып жатышат.

Алишер ТОКСОНБАЕВ, өз кабарчы