1,491 Бардыгы /

ОШ. МЕРСИКО эл аралык уюму Ош облусунун мектептерин тамак-аш менен камсыздоону ырааттуу жолго коюуда. Бул туурасында Президенттин Ош облустундагы ыгарым укуктуу өкүлүнүн орун басары Эрнис Толтоев билдирди.

Маалыматка караганда, МЕРСИКО эл аралык уюмунун кампасына Ош облусунун аймагындагы 64 мектептин окуучулары үчүн туура тамактануунун азыктары (байытылган ун, витаминдүү өсүмдүк майы, жасмык, жашыл буурчак, күрүч) келип түштү.

• Эл аралык уюмдун менеджери Саадат Саттарова менен кампага

келип түшкөн азык-түлүк менен таанышып, андан кийин Ош облусунун Ноокат районундагы МЕРСИКО менен жалпы билим берүүчү мекемелердин, жергиликтүү өз алдынча башкаруу органдарынын өз ара аракеттенүүсүн жеринде дагы бир сыйра көрүп чыктык. Президенттин Ош облусундагы ыйгарым укуктуу өкүлү Зиядин Жамалдиновдун тапшырмасына ылайык, жалпы билим берүүчү мектептердин ашканаларын иретке келтирүү, тиешелүү шарттарды түзүү жана ысык тамак берүүнүн шарттарын карап чыгуу милдети тиешелүү мамлекеттик органдарга коюлган. Учурда облуста ысык тамак же шашке чай уюштуруу иштери жолго коюлган, – деп кошумчалады Президенттин Ош облустундагы ыгарым укуктуу өкүлүнүн орун басары Эрнис Толтоев.

Белгилей кетээрибиз, МЕРСИКО эл аралык уюмунун I когортасына ылайык, Ош облусунда 64 мектеп (2022-жылы), II когортасы менен 73 мектеп (2023-жылы), III когортасы менен 57 мектеп (2024-ж), жалпысы 194 мектеп киргизилген.

Алишер ТОКСОНБАЕВ, өз кабарчы