1,410 Бардыгы /

          ОШ. Кыргызстандын түштүгүндөгү 127 жеке клиниканын арасынан бирөөсү гана мыйзам чегинде иштеп келатат. Бул жөнүндө маалымат жыйынында саламаттык сактоо министринин орун басары Улан Садыков шарданы кылды. Анын ырастоосуна караганда, жеке клиникаларды текшерүү өлкөбүздүн бардык облустарында жүргүзүлгөн жок.

– Текшерүү негизинен Ош, Баткен жана Жалал-Абад облустарын, ошондой эле Бишкек шаарын гана камтыды. Ош, Баткен жана Жалал-Абад облустарында жалпысынан 127 медициналык, косметологиялык жана стоматологиялык клиника жана эки окутуу борбор текшерилди.Лицензиясы жок 50 мекеме, бешөө ишмердүүлүгүн лицензияга ылайык жүргүзгөн эмес, 60 клиникада олуттуу мыйзам бузуулар катталса, бирөө гана мыйзам чегинде иштеп келген, – деп агынан жарылды Саламаттык сактоо министринин орун басары Улан Садыков.

 Сөз арасында Саламаттык сактоо министринин орун басары Улан Садыков текшерүү маалында жеке медициналык клиникалар өз эшиктерин жаап алып жатышкандыгын баса белгиледи. Ошондой эле жеке клиникалар тартипке келтирилгенге дейре жарандарды ал жактарга барбай турууга үндөдү.

Алишер ТОКСОНБАЕВ, өз кабарчы