1,195 Бардыгы /

1-ноябрь Кыргыз милициясынын түзүлгөндүгүнүн 95 жылдык мааркесине карата, Жалал-абад обласунун аймактарында тазалоо иштери жүргүзүлдү. Бул тууралуу Жалал-Абад ОИИБдин басма сөз кызматы маалымдады.

Маалыматка караганда, облус боюнча жер-жерлердеги ШРИИБде милицияда иштеп жатып, эли-жери үчүн жанын аябай, кызмат учурунда курман болгон кызматкерлердин аттарын алып жүргөн көчөлөрдү, мектеп, эстеликтердин айланасын тазалоо, көрктөндүрүү жана калыбына келтирүү иштери колго алынган.

Белгилеп кетүүчү жагдай, Ноокен районундагы туңгуч генерал Эргеш Алиев атындагы жалпы билим берүүчү орто мектебинде, Базар-Коргон районунда 2010-жылы июнь окуясында баатырларча курман болгон Мыктыбек Сулаймановдун бюсту, анын атына коюлган милициянын аймактык бөлүмчөсү, куралчан кылмышкерди кармоодо окко учкан Анвар Махмадалиевдин атына коюлган мектепте да коомчулук менен биргеликте тазалоо иштери жүргүзүлүп, айрым жазуулары жаңыланды. Ал эми Чаткал жергесинде курман болгон кызматкерлерди жана ардагерлерди эскерүү тактайчасы сырдалып, гүлчамбар коюуга даярдалды. Токтогул менен Кара-Көлдүн жамааты бул күндөрү кол куушуруп отурбастан сейил паркындагы көмүскөдө калган эстеликтердин айланасын жана өздөрүнүн имараттарын сырдашып, майрамга карата кооздогонго да үлгүрүштү.

Бул да болсо – милициянын тарыхында келечек үчүн из калтырып, мамлекеттин тынчтыгын жана элдин коопсуздугун ойлоп жанын берген улуу муунга таазим кылууга барабар.

“Аймак”