1,491 Бардыгы /

БАТКЕН. Баткен облусуна караштуу Кадамжай районундагы Бүргөндү айылынын Дюкр тилкесинде Баткен облусунун башчысы Абдыкарим Алымбаевдин тапшырмасына ылайык Кадамжай районунун Жаңы-Жер Айыл Өкмөтү тарабынан быйылкы жай айларындагы жаратылыш кырсыктарынан үйлөрү жапа чегишкен 75 жаранга турак жай салуу үчүн жер тилкеси бөлүнүп берилди. Ошентип, аймактагы эки райондун элин бириктирген Ынтымак айылы түптөлдү.

Баткен облус башчысынын жеке көзөмөлүнүн астында эки райондун элин бир айылга жайланыштырылды. Турак жай салуу үчүн жер тилкесин алып жаткан 75 жаран – Баткен районунун жана Лейлек районунун тургундары, алар жашаганга өтө кооптуу делген аймактардан токтоосуз көчүрүлгөн. Өзгөчө кырдаалдар министрлигинин атайын кызматы тарабынан буларды сөзсүз көчүрүү чечими чыккан. Жалпысынан Дюкр участкасында башкы планы даяр, бүгүнкү күндө 1500дөн ашык адамга турак жай үчүн жер тилкеси дагы берилген.

• Болочокто Ынтымак айылынан эл керегине жараган, мамлекеттин

өнүгүшү үчүн салмактуу салым кошкон эр азаматтар – уулдар жана кыздар чыгып, Ынтымак айылын дүйнөгө таанытат деген илгери  үмүттөмүн! Анан дагы жашоо үчүн керектелүүчү шарттарды түзүү үчүн бийлик тарабынан бардык аракеттер көрүлөт! – деп катуу убадалады Президенттин Баткен облусундагы ыйгарым укуктуу Өкүлү Абдыкарим Алымбаев.

          Ал эми селдин кесепетинен жабыр тартышып, бүгүн турак жайга ээ болушкан жарандар облус башчысы баштаган жергиликтүү бийлик өкүлдөрүнө терең ыраазычылыгын билдиришип, а түгүл ак батасын дагы берип ийишти.

Алишер ТОКСОНБАЕВ, өз кабарчы