1,569 Бардыгы /

ӨЗГӨН. Өзгөн районунда Улуу Ата Мекендик согуштун жалгыз ардагерине 80 миң сом жана белектер тапшырылды.

Улуу Ата Мекендик согуштун 76 жылдыгына карата Өзгөн районундагы жалгыз ардагер Турду Сатыкуловго Президент тарабынан 70 миң сом, Өзгөн райондук мамлекеттик акимчилигинин резервдик фондунан 10 миң сом акча каражаты жана Орусиянын Кыргызстандагы Элчилигинин баалуу белек-бечкектери ыйгарылды.

Турду Сатыгулов 1925-жылы Өзгөн районунун Көлдүк айылында туулган, улуту кыргыз, билими орто. Улуу Ата Мекендик согуштун жана эмгектин ардагери. Ал 1943-жылы 18 жашка толгондо согушка чакыртылып, алгач даярдоо курсунан өтүп, 277-аткычтар дивизиясында “катардагы жоокер” болуу менен согуш талаасына аттанган. Улуу Жеңишти 1945-жылы Калининград шаарында тоскондон кийин, туулуп өскөн жери Көлдүк айылына кайтып келген.

Ардагер көптөгөн орден, медалдардын ээси жана бир нече сыйлыктарга татыган. Үй-бүлөлүү, 7 уул, 4 кыздын, 50 неберенин, 50 чеберенин кадырлуу атасы.

Алишер ТОКСОНБАЕВ, өз кабарчы