870 Бардыгы /

Улуттук коопсуздук боюнча мамелкеттик комитеттин (УКМК) төрагасы Камчыбек Ташиев чек арадагы кырдаал көзөмөлдө экенин билдирди. Бул тууралуу ал NUR-TV каналына берген маеги учурунда айткан.

“Акыркы 3-4 күндө чек арадагы абал татаалдаша баштаган, көптөгөн кооптонуулар пайда болду, ушул жумуштар менен алекмин. Кечээ эле эки тараптуу сүйлөшүүбүз Көк-Ташта түнкү саат 12-1лерде бүттү. Абал көзөмөлдө, чек ара бекем, биз кызматта”, – деген Ташиев.

Чек ара кызматы кыргыз-тажик чек арасындагы Дахма аймагында ок атылганын 1-декабарда билдирген.

Расмий кабарга ылайык, 1-декабрда кечки саат 9дан өткөндө мамлекеттик чек аранын шарттуу тилкесинде Тажикстан тараптан белгисиз кишилер болжол менен аңчылык мылтыгынан 7-8 жолу ок атышкан. Окуя болгон жерге Кыргызстандын жана Тажикстандын чек ара бекеттеринин жетекчилери келип, мылтык аткандарды чогуу издөөнү макулдашкан. Күч органдарына да кабар берилген. Тажикстандан расмий комментарий боло элек.

УКМКнын алдындагы Чек ара кызматы Баткен облусунун Баткен районунун Дахма жерлигинде түн тынч өткөндүгүн билдирди. Аталган мекеменин басма сөз кызматы тараткан маалыматка караганда, Кыргызстан менен Тажикстандын чек ара өкүлдөрү 1-декабрда Баткен облусунун Төрт-Көчө жерлигинде жолугуп, биргелешкен кайгуул уюштуруу чечимине келишкен.

Ушул күнү Баткен районунун Көк-Таш айылынын тургунун кошуна өлкөнүн жарандары сабап коюп, ооруканага түшкөнү, кыргызстандыктар да бир тажик жаранын кармап алып, кийин бошотушканы кабарланган.

Кыргыз-тажик чек арасындагы такталбаган аймактардын айынан тез-тез жаңжал чыгып турат. 2021-жылдын жазындагы куралдуу кагылышта эки тараптан ондогон тургундар, аскерлер көз жумган.

WWW.