984 Бардыгы /

БИШКЕК. АКШнын эл аралык өнүктүрүү агенттиги (USAID) Борбор Азияда сооданы өнүктүрүү боюнча жаңы Программаны ишке киргизгендигин жарыялады. Долбоордун жалпы бюджети 19 миллион  АКШ долларын түзөт. Бул беш жылдык Программа Казакстанда, Кыргызстанда, Тажикстанда, Түркмөнстанда жана Өзбекстанда иштемекчи.

Аталган Программанын эң башкы максаты – Борбор Азияда экономикалык мүмкүнчүлүктөрдү ого бетер кеңейтүү. Муну үчүн долбоор бажы жана чек ара контролдоо жол-жоболорун заманбап шайкештөөгө, соода жана инвестиция маселелеринде мамлекеттик жана жеке секторлордун өнөктөштүгүнө жана аймактардагы ишканалардын кызматташуусуна гана көмөктөшөт. Кыргыз Республикасында Борбор Азиядагы соода боюнча программа Экономика жана коммерция министрлиги, Транспорт жана коммуникациялар министрлиги, Экономика жана каржы министрлигине караштуу Мамлекеттик бажы кызматы жана Кыргыз Республикасынын Соода-өнөр жай палатасы менен кызматташтыкта гана жүзөгө ашырылат.

• Туруктуу экономикалык өсүш жана жумуш орундарын түзүү үчүн

 соода-сатык абдан олуттуу мааниге ээ. Кыргыз Өкмөтү коңшу өлкөлөр менен сооданы жана өз ара кызматташууну мындан ары илгерилетүү үчүн көптөгөн идиректүү чараларды көрдү. Бул ийгиликтерге таянуу менен, биз жаңы Программанын алкагында мындан ары дагы өз ара кызматташтыкты ырааттуу түрдө улантабыз жана Кыргыз Республикасынын эли үчүн көбүрөөк соода мүмкүнчүлүктөрүн түзө алабыз деп терең үмүттөнөм! – деп баса белгиледи Кыргыз Республикасындагы USAID өкүлчүлүгүнүн директорунун милдетин аткаруучу Кит Симмонс.

Ошентип, бул Программанын алкагында экспортко маанилүү болгон сертификатташтыруу, каржылоо жана жүк ташуу сыяктуу кызматтарды кеңейтүүгө байланыштуу маселелер жепжеңил түрдө чечилет. Ошондой эле жергиликтүү компаниялар чет элдик сатып алуучулар менен дагы таанышып, жаңы рынокторго чыгууга өбөлгө түзүү үчүн түрдүү жолугушуулар жана башка дагы келечектүү иш-чаралар байма-бай уюштурлат.

Кыргыз Республикасынын экономика жана коммерция министрлигинин бажы саясаты бөлүмүнүн башчысы Руслан Тыналиевдин айтымында, жогорудагы жаңы программа соода жол-жоболорун жеңилдетүү аркылуу сооданы жакшыртууга жардам берет: –   Убакытты үнөмдөө жана жөнгө салуу мамлекеттик жол-жоболорун оптималдаштыруу соода компанияларга оң таасирин тийгизет. 

Алишер ТОКСОНБАЕВ, өз кабарчы