798 Бардыгы /

          ОШ. Кыргызстандын Түштүк башкалаасындагы Тез жардам кызматы автоматташтырылууда. Бул туурасында Саламаттык сактоо министрлигинен кабарлашты. Ошондуктан, саламаттык сактоо министринин орун басары Бакыт Жангазиев Ош шаарындагы Тез жардам борборунун автоматташтырылган маалымат тутумун пилоттук режимде ишке киргизүүнүн жүрүшү менен жеринде таанышты.

          Иш сапарынын жүрүшүндө министрдин орун басарын Бакыт Жангазиевге телефон чалууларды каттоо, чакырууга баруучу топту дароо аныктоо, медициналык документтерди электрондук түрдө толтуруу өёдөнгөн маалыматтык системанын мүмкүнчүлүктөрү дагы кошо көрсөтүлдү.

          – Ош шаарындагы тез жардам кызматын автоматташтыруу быйылкы жылы ишке ашырып жаткан приоритеттүү долбоорлордун бири. Биз жакынкы келечекте санариптик чечимдерди ишке ашырууда оң натыйжаларды көрө баштайбыз деп күтөбүз. А бул биринчи кезекте чалууну иштеп чыгуу убактысынын кыскарышы. Пилоттук долбоордун жыйынтыгы менен биз республикада маалыматтык системаны кеңейтүү боюнча иштерди баштайбыз, – деп баса белгиледи саламаттык сактоо министринин орун басары Бакыт Жангазиев.

          Ошондой эле саламаттык сактоо министринин орун басары Бакыт Жангазиев жумушчу сапарынын алкагында Ош шаарындагы Медициналык тез жардам борборунун, Ош шаардык үй-бүлөлүк дарыгерлер борборунун жана клиникалык ооруканасынын жетекчилери, Ош шаарынын мэриясынын өкүлдөрү менен медициналык жардам көрсөтүүдөгү үзгүлтүксүздүк жана маалымат системасынын туруктуулугу үчүн бейтаптар тууралуу маалымат алмашуу маселелерин кенен-чонон талкуулады.

          Белгилей кетчү жагдай: «Санарип MED» санариптик саламаттыкты сактоону өнүктүрүүнүн максаттуу моделин жүзөгө ашыруунун алкагында бейтаптардын жана медицина кызматкерлеринин ыңгайлуулугу үчүн бардык иштелип чыккан маалыматтык системалар бирдиктүү санариптик схемага интеграцияланган.

          Алишер ТОКСОНБАЕВ, өз кабарчы